Vita dhidi ya Ukimwi

Wakati Muungano wa nchi za Afrika (AU) unapoanza mkutano wake wa 21 na kuadhimisha miaka 50 ya kuungana kwa bara Afrika, Mpango wa pamoja wa Umoja wa Mataifa kuhusu virusi vya HIV na UKIMWI (UNAIDS), umetoa ripoti mpya inayoonyesha hatua zilizopigwa katika kupiga vita UKIMWI barani humo.

Kwa mujibu wa ripoti hiyo, idadi ya watu wanaopokea matibabu ya dawa za kupunguza makali ya virusi vya HIV imeongezeka na kufikia milioni 7.1 mwaka 2012, wakati idadi hiyo ilikuwa chini ya milioni 1 mnamo mwaka 2005. Mwaka uliopita pekee, idadi hiyo ilipanda kwa watu milioni moja.

Kwa mujibu wa ripoti hiyo ya UNAIDS, vifo kutokana na UKIMWI pia vimeendelea kupungua- viwango vya vifo vikishuka kwa asilimia 32 kati ya 2005 na 2011, huku viwango vya maambukizi mapya ya virusi vya HIV vikishuka kwa asilimia 33 kati ya 2001 na 2011.

Ripoti hiyo inasema ufanisi huu umetokana na uongozi imara na wajibu wa ushirikiano barani Afrika na katika jamii ya kimataifa, huku ikitoa wito kuwepo juhudi endelevu ili kuhakikisha bara Afrika linafikia lengo la kutokomeza maambukizi, ubaguzi na vifo vitokananvyo na UKIMWI.

madhara ya tufani huko Oklahoma

Katibu Mkuu wa Umoja wa Mataifa Ban Ki-Moon amewandikia barua Gavana wa jimbo laOklahomanchini Marekani kufuatia janga la vifo na majeruhi lililotokana na tufani iliyopiga eneohilosiku ya Jumatatu. Bwana Ban amesema yeye binafsi na Umoja wa Mataifa kwa ujumla wako pamoja na wakazi wa jimbo hilo na kwamba wako tayari kutoa msaada wowote kadri watakavyoombwa katika kusaidia jitihada za kujikwamua na janga hilo. Katibu Mkuu pia ametuma rambi rambi kwa familia za wafiwa na wote wale walioathiriwa na tufani hiyo.

Mary Robinson

Mwakilishi wa Katibu Mkuu katika nchi za ukanda wa Maziwa Makuu, Mary Robinson, ameelezea wasiwasi wake kufuatia kuzuka tena kwa mapigano hivi karibuni katika maeneo karibu na mji wa Goma, mashariki mwa Jamhuri ya Kidemokrasi ya Kongo, DRC, akitolea wito uungwaji mkono wa juhudi zote zinazoendelea ili kuleta amani na utulivu katika ukanda huo.

Bi Ribinson amesema kuteseka na kulazimika kwa watu kuhama mashariki mwa DRC, hususan wanawake na watoto, kumeendelea kwa muda mrefu sana, na hakuwezi kukubalika kuendelea zaidi.

Bi Robinson ameitoa kauli hii wakati akitoa mapendekezo ya kanuni zitakazotumiwa kuongoza juhudi za sasa za kuutatua mzozo wa ukanda huo, huku akisisitiza uzingatiwe mtazamo wa suluhu la kudumu.

Mjumbe huyo wa Umoja wa Mataifa pia ametoa wito hatua zichukuliwe kuongeza kasi ya urejeaji nyumbani wakimbizi kwa hiari, na kuzindua tena programu za kuyavunja makundi yenye silaha.

Bi Robinson ataungana na Katibu Mkuu Ban Ki-moon na rais wa Benki ya Dunia Jim Yong Kim katika ziara yao nchini DRC kuanzia tarehe 22 hadi 24 Mei.

Nkosazana Dlamini-Zuma

Mwenyekiti wa Tume ya Umoja wa Afrika, Dkt. Nkosazana Dlamini-Zuma amehutubia baraza la afya la shirika la afya duniani, WHO hukoGeneva, Uswisi na kusema kuwa Umoja wa Afrika unaamini kuwa kuboresha sekta ya kilimo ni njia mojawapo ya kuimarisha sekta ya afya. Dkt. Nkosazana amesema sekta hakika ya kilimo itawezesha kupatikana fedha za ziada kwa ajili ya kuimarisha sekta ya afya. 

(SAUTI YA Dkt. Nkosazana)

 "Kupatia kipaumbele kilimo, chakula, lishe na usalama, kwa kuwa na uhakika wa chakula tunaweza kuokoa zaidi ya dola Bilioni Mbili ambazo kwa sasa tunatumia kuagiza chakula. Na tunafirikiri fedha hizi zinaweza kupelekwa kwenye elimu na afya na vipaumbele vingine na wakati huohuo tunaweza kuongeza thamani katika chakula tunachozalisha."

 Halikadhalika amesema Umoja wa Afrika unaamini katika kutoa elimu dhidi ya mambo yanayochagiza magonjwa yasiyo ya kuambukiza, mathalani kuelimisha watu juu ya madhara ya uvutaji sigara, na hivyo kuwa na jamii yenye afya. Amewaeleza wajumbe pia kuwa suala muhimu ni kuhakikisha marekebisho ya upatiaji fedha sekta ya afya yalenge kuboresha huduma za msingikamanjia mojawapo ya kuimarisha afya ya jamii.

Rais wa Msumbiji Mheshimiwa Armando Emilio Guebuza akutana na KM wa UM Ban Ki-moon

Katibu Mkuu wa Umoja wa Mataifa, Ban Ki-moon, amehitimisha ziara yake nchini Msumbiji, huku akiisifu nchi hiyo kwa hatua ilizopiga kimaendeleo. Mengi zaidi na Joshua Mmali

TAARIFA YA JOSHUA MMALI

Akihitimisha ziara yake nchini Msumbiji, Katibu Mkuu Ban Ki-moon amesema katika kipindi cha miongo miwili ilopita, nchi hiyo imepiga hatua, na kuonyesha kuwa nchi inaweza kujikwamua kutoka katika mizozo. Amesema tangu kutiwa saini mkataba wa amani mnamo mwaka 1992, Msumbiji imekuwa ikipiga hatua kuelekea kwa demokrasia ya kina, maendeleo ya kiuchumi na kijamii, na utulivu wa kisiasa.

Akiongea katika mkutano na waandishi wa habari, ambao pia ulihudhuriwa na Waziri wa Mambo ya Nje wa Msumbiji, Bwana Ban ametangaza kuwa amemteua Rais Guebuza kuwa mjumbe bingwa wa elimu.

"Msumbiji imepiga hatua katika kuendeleza elimu na usawa wa kijinsia. Asubuhi ya leo, nikikutana na Rais Gebuza, nikisifu hatua zilizopigwa katika elimu, nimemwomba Rais Gebuza achukue wajibu wa kuwa mjumbe bingwa wa elimu, na nimefurahi kuwa amekubali wajibu huo wa kuwa mjumbe bingwa wa elimu."

Bwana Ban pia ameisifu Msumbiji kwa mchango wake katika juhudi za maendeleo ya kikanda, pamoja na kugusia ziara anayaonuia kufanya katika Jamhuri ya Kidemokrasi ya Kongo, DRC na jinsi anavyotarajia kuwahusisha viongozi wengi zaidi katika kuutatua mzozo mashariki mwa DRC, wakati wa mkutano wa Muungano wa nchi za Afrika mjini Addis Ababa.

Biashara ya maji Niger

Shirika la Umoja wa Mataifa la kuhudumia wakimbizi, UNHCR linahaha kudhibiti mlipuko wa ugonjwa wa kipindupindu kwenye kwambi za wakimbizi nchiniNiger, tangu serikali ya nchi itangaze mlipuko wa ugonjwa huo tarehe 11 mwezi huu. Mlipuko wa kipindupindu magharibi mwaNigerhadi sasa umesababisha vifo vya watu Saba wamekufa wakiwemo wakimbizi wawili kutokaMaliwaliokuwa wakiishi kambi ya Mangaize. Melissa Flemming ni msemaji wa UNHCR.

(SAUTI YA MELISSA)

Kipindupindu ni ugonjwa unaosababishwa na kunywa maji machafu hususan yaliyochanganyika na kinyesi kibichi.

Mtoto apokea chanjo

Shirika la Umoja wa Mataifa linalohusika na watoto UNICEF pamoja na washirika wake linajiandaa kuanzisha kampeni ya dharura kwa ajili ya njanjo kukabili tishio la ugonjwa wa surua ambao ameripotiwa kuwakumba watoto kadhaa katika Jamhuri ya Afrika ya Kati.Vipimo vilivyofanywa mwezi April mwaka huu katika mji mkuu Bangui vimebaini watoto 8 wamekumbwa na ugonjwa huo.

Kampeni hiyo inatazamiwa kufanywa kuanzia May 22 hadi 26 mwaka huu ikilenga kuwafikia zaidi ya watoto 125,00 .

Marixie Mercado ni msemaji wa UNICEF

(Marixie Audio)

Jim Yong Kim

Benki ya dunia imetaka jitihada za kimataifa zichukuliwa katika kuhakikisha kila mtu duniani ana uwezo wa kupata huduma bora za afya. Akihutubia kikao cha mwaka cha baraza kuu la shirika la afya duniani, WHO huko Geneva, Uswisi, Rais wa Benki ya Dunia, Jim Yong Kim amesema ili kufikia lengo la kutokomeza ufukara mwaka 2030, nchi zote zinapaswa kuhakikisha raia wake wana uwezo wa kupata huduma bora za afya. Amesema wakati nchi hizo zitahigaji uchumi bora na jumuishi ili kuondoa umaksini, halikadhalika zinapaswa kuwekeza katika kuboresha afya, elimu, na hifadhi ya jamii kwa raia wote.

 (SAUTI- KIM)

 "Kwa makadirio ya sasa, gharama za afya zinatumbukiza watu Milioni 100 katika umaskini wa kupindukia kila mwaka na kuwasababishia wengine Milioni 150 mazingira magumu ya kifedha. Hii ni aina mbaya ya ugumu wa maisha kwa watu kwa kuwa machungu ya umaskini yanachanganyika na magonjwa. Kupanua utoaji wa huduma ya afya miongoni mwa maskini kwenye nchi yoyote ile ni muhimu katika kujenga uwezo na kuwawezesha kuingia katika ushindani wa ajira ambao utabadili maisha yao. Tunapaswa kuondoa hili pengo la huduma za afya iwapo tuko makini katika kuondoa tofauti za kiuchumi, kuimarisha nchi zetu kiuchumi na kujenga jamii ambazo kwazo kila mtu ana fursa sawa."

 Bwana Kim amesema Benki ya dunia iko makini kusaidia nchi kufikia malengo ya maendeleo ya mileni kwa kupunguza vifo vya wajawazito na watoto akieleza kuwa huo ni mtihani mkuu kwa ahadi ya benki hiyo ya kuweka uwiano wa afya.

SOko la vyakula, Misri

Ripoti mpya iliyotolewa Jumanne inaonyesha kuzidi kuongezeka kwa umaskini na ukosefu wa uhakika wa chakula nchini Misri kwa kipindi cha miaka mitatu iliyopita. Grace Kaneiya ana ripoti zaidi.

(SAUTI YA GRACE)

Ripoti hiyo iliyoandaliwa kwa ushirika kati ya shirika la mpango wa chakula duniani WFP, taasisi ya kimatifa ya utafiti wa sera za chakula na taasisi kuu ya takwimu za umma nchini Misri inaonyesha kuwa asilimia 17 ya wamisri wote hawakuwa na uhakika wa chakula mwaka 2011 ikilinganishwa na asilimia 14 mwaka 2009.

Halikadhalika kiwango cha utapiamlo unaonekana miongoni mwa watoto waliodumaa wenye umri wa chini ya miaka mitano kinaongezeka. Mwakilishi mkazi wa WFP nchini Misri, GianPetro Bordignon amesema ukosefu wa uhakika wa chakula siyo kitu kilichoibuka tu mara moja bali ni matokeo ya majanga yaliyopokezana tangu mwaka 2005.

Majanga hayo ni pamoja na mlipuko wa homa ya mafua ya ndege na kupaa kwa bei za vyakula na mafuta. Ripoti hiyo imesema ruzuku ya chakula imekuwa na msaada mkubwa kwa maskini lakini haijaweza kumaliza chanzo cha umaskini.

Badala yake ripoti imependekeza mambo kadhaa ikiwemo kuanzishwa kwa fursa za ajira katika maeneo ya maskini.